2024 թվականի սեպտեմբերի 19-ին Մարտունի համայնքում «Լեռնային Ղարաբաղից բռնի տեղահանվածների իրավունքների պաշտպանության մեխանիզմների ուժեղացում» ծրագրի շրջանակներում Ծրագրի իրավաբանը Արցախից բռնի տեղահանված անձանց տրամադրել է անվճար իրավաբանական խորհրդատվություն և ներկայացրել armrights.am էլեկտրոնային հարթակը։

Armrights.am թվային հարթակն ունի առանցքային նշանակություն՝ ապահովելով հասանելիություն, տեղեկատվության կենտրոնացում, թափանցիկություն և արդյունավետություն: Այն նաև նպաստում է տվյալների հավաքագրմանը և իրազեկվածության բարձրացմանը: Հանդիպման ընթացքում մանրամասն ներկայացվեցին կայքի բաժինները, դրանց նշանակությունը, ինչպես նաև հայտ ներկայացնելու և դրա ընթացքին հետևելու գործընթացը: Այս ամենը նպատակ ունի օգնել տեղահանված անձանց արդյունավետորեն օգտվել այս կարևոր ռեսուրսից:

Հանդիպման ընթացքում քննարկվեցին Լեռնային Ղարաբաղից բռնի տեղահանված անձանց հուզող բազմաթիվ հարցեր: Դրանք հիմնականում վերաբերում էին սոցիալական աջակցության նախորդ ամիսների չստացված գումարների վճարմանը, աշխատանքային գրքույկների վերականգնմանը և աշխատանքային ստաժը հաստատող այլ փաստաթղթերի ձեռքբերման ընթացակարգին: Քննարկվեցին նաև հաշմանդամության կենսաթոշակի նշանակման համար անհրաժեշտ գործողությունները, ալիմենտային պարտավորությունների կատարման առանձնահատկությունները և անվճար կամ արտոնյալ պայմաններով դեղերի հատկացման կարգը:

 Հանդիպմանը մասնակցում էր նաև Արցախից բռնի տեղահանվածների իրավունքների պաշտպանության ՔՀԿ-ների ցանցի կառավարման խորհրդի նախագահ, «Հարմոնիա» շուշեցի կանանց ՀԿ-ի գործադիր տնօրեն Ջուլետտա Առուստամյանը: